Ragdres Kresen Kernow

Re beu ughelhwans dres termyn hir rag Kernow dhe gavos kresen govskrifva ha lyverva rag studhyans teythyek nowydh. Dres termyn an tybyans a waynyas momentom ha skoodhyans a Gonsel Kernow, ha tyller Bragji Resrudh kyns a veu dewisys rag hy thre yn 2012. Profyans kynsa sewen dhe’n Fondyans Gwari Dall Ertach a veu gwrys diwettha y’n vledhen na, hag a veu holyes gans kussulyans efan ow komprehendya 2500 person dres Kernow oll. Yn mis Ebrel 2015 profyans leun rag £11.7 milvil a veu submyttys ha pes da o an para ragdres pan glewas y vos sewen yn hav 2015.

Rann a dyller an Bragji Resrudh kyns – synsys ynni magor a’n chi braga – a veu prenys, ha wosa termyn spenys ow klanhe hag anvostya an le, drehevyans a gresen govadhow nowydh rag Kernow a dallathas yn 2016.

An gresen nowydh a dhevnydh an Chi Braga istorek, gans spasow rag hwithrans poblek ha dyskans, ha diskwedhyansow, keffrys ha kovskrifva nowydh rag moy es 1.5 milvil a vammskrifow, mappow ha skrifennow dhyworth Sodhva Govadh Kernow, milyow moy a skeusennow, lyvrow, ha paperyow nowodhow a’n Lyverva Studhyansow Kernewek, ha’n kovadhow hendhyskoniethel ha skeusennow a’n Kovadh Kerghynnedh Istorek. Yma mayni a’n tri gonis oll owth oberi yn Kresen Kernow.

Avel rann a’n ragdres Kresen Kernow, an para re restras ynwedh kansow a hwarvosow hag aktivitys dres Kernow, y’ga mysk godrigow skol, hweljiow awenek, diskwedhyansow, aktivitys teylu, arethow ha tornow hatt kales.

Diskudha moy a-dro an ragdres ma dre vires orth agan fylmya (Sowsnek):