Istori teyluyow

Tus dhyworth oll an bys a vysyt Kresen Kernow rag diskudha moy a-dro dhe vewnansow aga hendasow gernewek. Ni a’gan beus skrivennow pals a lies eghen, hag a yll agas gweres dismygi piw o agas hendasow, ple trigens, ha fatel o aga bewnansow.

Yn mysk an fentynnyow an moyha dhe les, yma an kovlyvrow pluwek, gwithys dhyworth 1538. Unnses governans leel o an bluw, hag a res yw an kovadhow ma rag diskudha an besydhyow, demedhyansow hag  ynkleudhyansow agas hendasow. Kresen Kernow yw tre dhe govlyvrow a-dhyworth oll an 257 a bluwow yn Kernow, kyn tevnydhir hwath an kovlyvrow a-lemmyn y’n eglosyow. Ni a with keffrys moy es 500 kovlyver Methodek, Krenoriethek, Kuntellyansel ha Besydhek. Y hyllir mires orth an kovlyvrow ma war gorrgennen orth agan stevell-redya, le may ma kavadow treusskrifow ynwedh.

Tre yw Kresen Kernow ynwedh a voy es 65000 kemynskrif 1600 – 1857, ha dasskrifow-kovlyver a gemynskrifow 1858 – 1941. An re ma a yll derivas dhywgh an pythow a biwo agas hendas, ha ri dhywgh kevarwodhyow posek a-dro dh’aga herens ha py par bywnans a’s tevo. Kavadow warlinen yw kemynskrifow wosa 1857.

Yn Breten Veur y tallathas kovskrifans sivil yn 1837, ytho res o dhe dus synsi testskrif genesigeth, demedhyans ha mernans. Fentynnyow meur dhe les yns i, ha kavadow yw dasskrifow rag talas dhyworth Gonis Kovskrifans.

Pur dhe les yw an niveryans rag diskudha moy a-dro dh’agas hendasow wosa 1841. Kevernys pub deg bledhen oll, ev a dheskrif piw a driga yn kettep koskordh yn Breten Veur, aga bloodh ha’ga sodhow. An fordh esya dh’aga drehedhes yw warlinen dre wiasvaow kepar ha ‘Find My Past’: y hyllir drehedhes hemma heb kost dhe Gresen Kernow ha lyvervaow poblek, po dre ragbren yn tre. Kavadow yw Niveryansow a 1841-1911, hag y hyllir drehedhes kovlyver rag 1939. Deges yw manylyon an Niveryans rag 100 bledhen.

Fentynnyow erel dhe les rag istori teylu synsys yn Kresen Kernow a gomprehend kovadhow Lagha Boghosogneth, titlow, gobrenansow, mappow degedhow, kovlyvrow skolyow ha prisonyow, skeusennow ha moy lower. Paperyow-nowodhow yw fentynnyow dhe les rag avisyansow genesigeth, demedhyans ha mernans, keffrys ha derivasow ynkleudhyans ha notyansow ankow. Studhyansow dyllys a-dro dhe neb unn hanow teylu a allsa bos dhe les ynwedh.

Ty a yll iskarga omma Gidlyver Kresen Kernow orth Istori Teylu (Sowsnek)

Termys hwithra alhwedh:  baptism, marriage, burial, census, graveyard, monumental inscription, will, individual names and surnames, parish names or place names

Kuntellow alhwedh: P (Parish records), MR (Methodist records), AP, DRB (Probate records), SF (Quaker records)

Dyllansow alhwedhThe Cornish family: the roots of our future by Bernard Deacon, 2004. Y kevir studhyansow rag henwyn teylu unnik der an menegvaow magata.